بھارت جوڑو یاترا کے دوسرے مرحلے کی شروعات اگست میں متوقع

نئی دہلی : کانگریس قائد راہل گاندھی کی بھارت جوڑو یاترا کی زبردست کامیابی کے بعد اب بھارت جوڑو یاترا کے دوسرے مرحلہ کا منصوبہ بنایا جارہا ہے۔ گذشتہ سال شروع ہوئی بھارت جوڑو یاترا کا جاریہ سال جنوری میں اختتام ہوا تھا جسے کنیا کماری سے کشمیر تک نکالا گیا تھا۔ جیسے جیسے پانچ ریاستوں کے اسمبلی انتخابات اور لوک سبھا کے انتخابات قریب آ رہے ہیں، اطلاعات کے مطابق کانگریس پارٹی کی جانب سے بھارت جوڑو یاترا کے دوسرے مرحلے کی تیاریوں میں بھی شدت لائی جارہی ہے۔ قبل ازیں بھارت جوڑو یاترا کنیا کماری سے کشمیر یعنی جنوب سے شمالی ہندوستان تک نکالی گئی تھی تاہم اب دوسرے مرحلہ کے تحت گجرات سے تریپورہ یعنی مغرب سے مشرقی ہندوستان تک یہ یاترا نکالی جائے گی۔ کانگریس پارٹی کے معتبر ذرائع کے مطابق بھارت جوڑو یاترا کے دوسرے مرحلہ کا آغاز ستمبر یا اکتوبر میں بھی ہوسکتا ہے۔ بھارت جوڑو یاترا قومی رابطہ کمیٹی کے سربراہ دگ وجے سنگھ اس مرحلہ کیلئے تیاریوں میں مصروف ہیں۔ ان کی قیادت میں بھارت جوڑو یاترا کے دوسرے مرحلے کا ایکشن پلان تیار کیا جا رہا ہے۔ دوسرے مرحلے کے آغاز کی تاریخ اور روٹ میاپ کو حتمی شکل دینا ابھی باقی ہے۔بتایا جارہا ہے کہ بھارت جوڑو یاترا کے دوسرے مرحلے کا آغاز گجرات کے پوربندر سے ہوگا جبکہ تریپورہ کے اگرتلہ میں یاترا کا اختتام ہوگا۔