اورنگ آباد میں بچہ مزدوری کے خلاف مہم کا آغاز

اورنگ آباد: یکم مئی کو مہاراشٹر کے دن کے ساتھ ساتھ بین الاقوامی یوم مزدور کے طور پر منایا جاتا ہے اور 12 جون کو بچوں کی مزدوری کے خلاف عالمی دن کے طور پر منایا جاتا ہے۔ الہدیٰ اردو اسکول اور یونیک گائیڈنس سینٹر کے اشتراک سے فاؤنڈیشن نے طلبہ کی ریلی کا انعقاد کیا۔ ریلی الہدیٰ اردو اسکول سے شروع ہوئی اور مشن مریم مرزا محلہ لابٔرری تحریک کے ذریعے شروع کی گئی ڈاکٹر اے پی جے عبدالکلام محلہ لائبریری پر اختتام پذیر ہوئی۔ ریلی کے دوران استعمال کیے گئے نعروں میں سے کچھ یہ تھے کہ "پھاوڑا نہ کدال ہوگی ہر ہاتھ میں کتاب ہوگی”
تقریب کے منتظم مرزا ابوالحسن علی نے طلباء سے خطاب کرتے ہوئے مزدوروں کے عالمی دن کی تاریخ کے بارے میں بتایا اور بچہ مزدوری کو روکنے کی ضرورت پر زور دیا اور ہندوستان کے آئین میں دیئے گئے تحفظات کے بارے میں آگاہ کروایا۔ انہوں نے یہ بھی بتایا کہ طلباء کس طرح پوسٹر بنا کر، ڈرائنگ بنا کر ، مضامین لکھ کر اور تقریریں کر کے مہم میں حصہ لے سکتے ہیں۔ ہر حصہ لینے والے کو سرٹیفکیٹ دیا جائے گا، اور طلباء میں انعامات بھی تقسیم کیے جائیں گے۔ یونیک گائیڈنس سنٹر کے بانی ندیم خان نے طلباء کو ریاست مہاراشٹر کی بنیاد اور مہاراشٹر ڈے کیوں منایا جاتا ہے کے بارے میں بتایا۔
ریڈ اینڈ لیڈ فاؤنڈیشن کے صدر مرزا عبدالقیوم ندوی نے آٹھویں سے دسویں جماعت کے ضرورت مند طلباء کے لیے اسکالر شپ فراہم کرنے کا اعلان کیا۔ انہوں نے طلباء کو نصیحت کی کہ چائلڈ لیبر کا مطلب یہ نہیں ہے کہ گھر کے کام میں والدین کا نہ ساتھ دیا جائے۔ ہر طالب علم کو گھر کے کام میں اپنے والدین کی مدد کرنی چاہیے۔ اس کے علاوہ طلباء کو ماحول کو بچانے کے لیے اور اپنی حفظان صحت اور اپنے اردگرد کی صفائی کا خیال رکھنا ہوگا۔ طلباء میں 200 کتابیں تقسیم کی گئیں اور نشاط ترنم نے شکریہ کا کلمات پیش کیے۔ پروگرام کو کامیاب بنانے میں الہدی اسکول اور اساتذہ شیخ منتجیب الدین سر اور نازیہ مس نے اہم کردار ادا کیا