اے ایم یو میں بارہویں جماعت کے امتحان میں طالبات نے بازی ماری

علی گڑھ: علی گڑھ مسلم یونیورسٹی (اے ایم یو) کے سینئر سیکنڈری اسکول سرٹیفکیٹ (بارہویں جماعت) کے سالانہ امتحان کے نتائج کا آج اعلان کیا گیا جس میں طالبات نے طلباء کو پیچھے چھوڑ دیا اور عمدہ کارکردگی کا مظاہرہ کیا۔اے ایم یو کے کنٹرولر امتحانات دفتر کی جانب سے جاری نتائج کے مطابق فرح دیبا (سائنس اسٹریم) نے 500 میں سے 491 نمبر حاصل کرکے ٹاپ پوزیشن حاصل کی جبکہ لشکا راجپوت اور آیوش گوئل (سائنس اسٹریم) نے 500 میں سے 488 نمبر حاصل کرکے مشترکہ طور سے دوسرا مقام اور مِہرگپتا (سائنس اسٹریم) و مہک ارم (ہیومینیٹیز) نے 500 میں سے 487 نمبر حاصل کرکے تیسرا مقام حاصل کیا۔کنٹرولر امتحانات ڈاکٹر مجیب اللہ زبیری نے بتایا کہ بارہویں کے امتحان میں مجموعی طور پر 2793 طلباء و طالبات شریک ہوئے تھے جن میں سے 2720 طلباء وطالبات کامیاب رہے۔، اس طرح سے پاس ہونے کا مجموعی فیصد 97.38 ہے۔بچوں کی کارکردگی کی ستائش کرتے ہوئے اے ایم یو وائس چانسلر پروفیسر محمد گلریز نے انھیں مبارکباد پیش کی اور کہا کہ طلباء و طالبات کی محنت کی تعریف کی جانی چاہئے۔